ಫಲವಿದು ಬಾಳ್ದ್ದುದಕೆ Phalavidu baldudake

ಜಗನ್ನಾಥದಾಸರು

ಫಲವಿದು ಬಾಳ್ದ್ದುದಕೆ |ಪ|
ಸಿರಿ ನಿಲಯನ ಗುಣಗಳ ತಿಳಿದು ಭಜಿಸುವುದೆ |ಅ.ಪ.|
ಸ್ವೋಚಿತ ಕರ್ಮಗಳಾಚರಿಸುತ ಬಹು
ನೀಚರಲ್ಲಿಗೆ ಪೋಗಿ ಯೊಚಿಸದೆ
ಖೇಚರವಾಹ ಚರಾಚರ ಬಂಧಕ
ಮೋಚಕನಹುದೆಂದ್ಯೋಚಿಸುತಿಪ್ಪುದೆ 1
ನಿಚ್ಚ ಸುಭಕುತಿಯಲಚ್ಯುತನಂಘ್ರಿಗ
ತುಚ್ಚ ವಿಷಯಗಳ ಇಚ್ಛಿಸದೆ ಯ
ದೃಚ್ಛಾಲಾಭದಿಂ ಪ್ರೋಚ್ಚನಾಗುವುದೆ 2
ಮನೋವಾಕ್ಕಾಯದನುಭವಿಸುವ ದಿನ
ದಿನದಿ ವಿಷಯ ಸಾಧನಗಳಿಗೂ
ಅನಿಶಾಂತರ್ಗತ ವನರುಹದಳ ಲೋ
ಚನಗರ್ಪಿಸಿ ದಾಸನು ನಾನೆಂಬುದೇ 3
ವಾಸವ ಮುಖ ವಿಬುಧಾಸುರ ನಿಚಯಕೆ
ಈ ಸಮಸ್ತ ಜಗಕೀಶ ಕೇಶವಾ
ನೀಶ ಜೀವರೆಂಬ ಸುe್ಞÁನವೆ 4
ಪಂಚ ಭೇದಯುತ ಪ್ರಪಂಚವು ಸತ್ಯ ವಿ
ಭವ ಮುಖ ಬಲಿ ವಂಚಕಗೆ
ಸಂಚಲ ಪ್ರತಿಮೆ ಅಚಂಚಲ ಪ್ರಕೃತಿಯು
ಸಂಚಿಂತಿಸಿ ಮುದ ಲಾಂಭಿತನಹುದೆ 5
ಪಂಚ ಋತುಗಳಲಿ ಪಂಚಾಗ್ನಿಗಳಲಿ
ಪಂಚ ಪಂಚರೂಪವ ತಿಳಿದು
ಪಂಚ ಸುಸಂಸ್ಕಾರಾಂಚಿತನಾಗಿ ದ್ವಿ
ಪಂಚ ಕರಣದಲಿ ಪಂಚಕನರಿವುದೆ 6
ಹೃದಯದಿ ರೂಪವು ವದನದಿ ನಾಮವು
ಉದರದಿ ನೈವೇದ್ಯವು ಶಿರದಿ
ಪದ ಜಲ ನಿರ್ಮಾಲ್ಯವನೆ ಧರಿಸಿ ಕೋ
ಸದನ ಹೆಗ್ಗದವ ಕಾಯುವುದೆ 7
ಪಾತ್ರರ ಸಂಗಡ ಯಾತ್ರೆ ಚರಿಸುತ ವಿ
ಧಾತೃ ಪಿತನ ಗುಣ ಸ್ತೋತ್ರಗಳಾ
ಶ್ರೋತ್ರದಿ ಸವಿದು ವಿಚಿತ್ರಾನಂದದಿ
ಗಾತ್ರವ ಮರೆದು ಪರತ್ರವ ಪಡೆವುದೆ 8
ಹಂಸ ಮೊದಲು ಹದಿನೆಂಟು ರೂಪಗಳ
ಸಂಸ್ಥಾನವ ತಿಳಿದನುದಿನದಿ
ಸಂಸೇವಿಸುವ ಮಹಾಪುರುಷರ ಪದ
ಪಾಂಸುವ ಧರಿಸಿ ಅಸಂಶಯನಪ್ಪುದೆ 9
ವರ ಗಾಯಿತ್ರೀ ನಾಮಕ ಹರಿಗೀ
ರೆರಡಂಘ್ರಿಗಳ ವಿವರವ ತಿಳಿದು
ತರುವಾಯದಿ ಷಡ್ವಿಧ ರೂಪವ ಸಾ
ಅನುದಿನ ಧ್ಯಾನಿಸುತಿಪ್ಪುದೆ 10
ಬಿಗಿದ ಕಂಠದಿಂ ದೃಗ್ಭಾಷ್ಪಗಳಿಂ
ನಗೆ ಮೊಗದಿಂ ರೋಮಗಳೊಗೆದು
ಮಿಗೆ ಸಂತೋಷದಿಂ ನೆಗೆದಾಡುತ ನಾ
ಲ್ಮೊಗನಯ್ಯನ ಗುಣ ಪೊಗಳಿ ಹಿಗ್ಗುವುದೆ 11
ಗೃಹಕರ್ಮವ ಬ್ಯಾಸರದಲೆ ಪರಮೋ
ತ್ಸಹದಲಿ ಮಾಡುತ ಮೂಜಗದ
ಮಹಿತನ ಸೇವೆ ಇದೆ ಎನುತಲಿ ಮೋದದಿ
ಅಹರಹರ್ಮನದಿ ಸಮರ್ಪಿಸುತಿಪ್ಪುದೆ12
ಕ್ಲೇಶಾನಂದಗಳೀಶಾಧೀನ ಸ
ಮಾಸಮ ಬ್ರಹ್ಮ ಸದಾಶಿವರೂ
ಈಶಿತವ್ಯರು ಪರೇಶನಲ್ಲದೆ
ಶ್ವಾಸ ಬಿಡುವ ಶಕ್ತಿ ಲೇಸಿಲ್ಲೆಂಬುದೆ 13
ಏಕೋತ್ತರ ಪಂಚಾಶದ್ವರ್ಣಗ
ಳೇಕಾತ್ಮನ ನಾಮಂಗಳಿವು
ಸಾಕಲ್ಯದಿಯಿವರರಿಯರೆಂಬುದೆ 14
ಒಂದು ರೂಪದೊಳನಂತ ರೂಪವು
ಪೊಂದಿಪ್ಪವು ಗುಣಗಳಾ ಸಹಿತ
ಇಂದು ಮುಂದೆಂದಿಗು ಗೋ
ವಿಂದಗೆ ಸರಿಮಿಗಿಲಿಲ್ಲೆಂತೆಂಬುದೆ 15
ಮೇದಿನಿ ಪರಮಾಣಂಬು ಕಣಂಗಳ
ನೈದಬಹುದು ಪರಿಗಣನೆಯನು
ಮಾಧವನಾನಂದಾದಿ ಗುಣಂಗಳ
ನಾದಿ ಕಾಲದಲಿ ಅಗಣಿತವೆಂಬುದೆ 16
ಹರಿಕಥೆ ಪರಮಾದರದಲಿ ಕೇಳುತ
ಮರೆದು ತನುವ ಸುಖ ಸುರಿವುತಲೀ
ಉರುಗಾಯನ ಸಂದರುಶನ ಹಾರೈ
ಸಿರುಳು ಹಗಲು ಜರಿ ಜರಿದು ಬಾಳ್ವುದೆ 17
ಆ ಪರಮಾತ್ಮಗೆ ರೂಪದ್ವಯವು ಪ
ರಾಪರ ತತ್ತ್ವ ಗಳಿದರೊಳಗೆ
ಸ್ತ್ರಿ ಪುಂ ಭೇದದಿ ಈ ಪದ್ಮಜಾಂಡವ
ವ್ಯಾಪಿಸಿಹನೆಂದೀಪರಿ ತಿಳಿವುದೆ 18
ವಿಷಯೇಂದ್ರಿಯಗಳಲಿ ತದಭಿಮಾನಿ ಸುಮ
ನಸರೊಳು ನಿಂದು ನಿಯಾಮಿಸುತಾ
ವಾಸುದೇವ ತಾ
ವಿಷಯಂಗಳ ಭೋಗಿಸುವನೆಂದರಿವುದೆ 19
ಮೂಜಗದೊಳಗಿಹ ಭೂ ಜಲ ಖೇಚರ
ಈ ಜೀವರೊಳೊ ಮಹೌಜಸನ
ಪೂಜಿಸುತನುದಿನ ರಾಜಿಸುತಿಪ್ಪುದೆ 20
ಗುಣಕಾಲಾಹ್ವಯ ಆಗಮಾರ್ಣವ ಕುಂ
ಭಿಣಿ ಪರಮಾಣ್ವಾಂಬುಧಿಗಳಲಿ
ವನಗಿರಿ ನದಿ ಮೊದಲಾದದರೊಳಗಿಂ
ಧನಗತ ಪಾವಕನಂತಿಹನೆಂಬುದೆ 21
ಅನಳಾಂಗಾರನೊಳಿದ್ದೋಪಾದಿಯ
ಲನಿರುದ್ಧನು ಚೇತನರೊಳಗೆ
ಕ್ಷಣ ಬಿಟ್ಟಗಲದೆ ಏಕೋ ನಾರಾ
ಯಣ ಶ್ರುತಿ ಪ್ರತಿಪಾದ್ಯನು ಇಹನೆಂಬುದೆ 22
ಪಕ್ಷಗಳಕ್ಷಿಗಳಗಲದಲಿಪ್ಪಂ
ತ್ಯಕ್ಷರ ಪುರುಷನಪೇಕ್ಷೆಯಲಿ
ಕುಕ್ಷಿಯೊಳಬ್ಜಜ ತ್ರ್ಯಕ್ಷಾದ್ಯಮರರ
ಈಕ್ಷಿಸಿ ಕರುಣದಿ ರಕ್ಷಿಪನೆಂಬುದೆ 23
ಕಾರಣ ಕಾರ್ಯಾಂತರ್ಗತ ಅಂಶವ
ತಾರಾವೇಶಾಹಿತ ಸಹಜಾ
ಪ್ರೇರಕ ಪ್ರೇರ್ಯಾಂಹ್ವಯ ಸರ್ವತ್ರ ವಿ
ಕಾರವಿಲ್ಲದಲೆ ತೋರುವನೆಂಬುದೆ 24
ಸ್ತುತಿಸುತ ಲಕ್ಷ್ಮೀ ಪತಿಗುಣವ
ಕೃತಿಪತಿ ಸೃಷ್ಟಿ ಸ್ಥಿತಿಲಯ ಕಾರಣ
ಇತರ ಸರ್ವ ದೇವತೆಗಳಿಗಿನಿತಿಲ್ಲೆಂಬುದೆ25
ಪವನ ಮತಾನುಗರವ ನಾನಹುದೆಂ
ದವನಿಯೊಳಗೆ ಸತ್ಕವಿ ಜನರ
ಭವನಂಗಳಲಿ ಸಂಚರಿಸುತ ಸುಕಥಾ
ಶ್ರವಣವ ಮಾಡುತ ಪ್ರವರನಾಗುವುದೆ26
ಪನ್ನಗಾಚಲ ಸನ್ನಿವಾಸ ಪಾ
ವನ್ನಚರಿತ ಸದ್ಗುಣಭರಿತಾ
ಜನ್ಯಜನಕ ಲಾವಣ್ಯೇಕನಿಧಿ ಜ
ಗನ್ನಾಥವಿಠಲಾನಾನ್ಯಪನೆಂಬುದೆ 27

Purandara daasaru virachita Sreenivasa Kalyana (Vaikunta pati tanu)

ವೈಕುಂಠ | ಪತಿ ತಾನು | ವೈಕುಂಠವನ ಬಿಟ್ಟು | ವೇಂಕಟಾದ್ರಿಗೆ ಹೋಗಿ | ಶ್ರೀಕಾಂತ ನಿಂತ | ನಾಲ್ಕೂ ಕಡೆಯೂ ನೋಡಿ | ವಲ್ಮೀಕವನೆ ಕಂಡು | ಏಕಾಂತ ಸ್ಥಳವೆಂದು | ಬಹುಕಾಲವಲ್ಲಿದ್ದ ||೧||

ಚೋಳ ಬೃತ್ಯನು ಶಿರವನೊಡೆದ ಗಾಯವ ನೋಡಿ | ತಾಳಲಾರದೆ ಸ್ವಾಮೀ | ಗುರುಗಳ ಕರೆಸಿ | ಹೇಳೀದೌಷದ ಮಾಡಿ ಕ್ರೋಡ ರೂಪಿಯ ಕಂಡು | ಕೇಳಿ ಸ್ಥಳವನೇ ಕೊಂಡು | ಲೀಲೆ ತೋರುತಲಿ ||೨||

ಇರುತಿರಲೊಂದಿನ ತುರಗ ಸ್ಮರಿಸುತಲಿ | ತುರಗ ಬರಲು ಕಂಡು | ಮುದಿದ ತಾನೇರಿ | ಪರಿಪರಿ ಮೃಗಗಳ ಅಡವಿಯಲಿ ಕೊಂದು | ಕರುಣಾಸಾಗರ ಒಂದು ವನವ ಕಂಡನು ||೩||

ವನದಲ್ಲಿ ವನಜಾಕ್ಷಿ | ರಾಜಪುತ್ರಿಯ ಕಂಡು | ಮನಕೆ ಬಂದಂತಾಡಿ | ಕಲಹಮಾಡಿದರು | ಮನಸಿಜಪಿತ ತಾನು ಅಶ್ವವ ಕಳಕೊಂಡು | ಘನವಾದ ಗಿರಿ ಏರಿ ಮಲಗಿದ ಹರಿಯು ||೪|

ನಗಧರ ಮಲಗಲು ಬಕುಳಾವತಿ ಆಗ | ಬಗೆ ಬಗೆ ಕೇಳಲು | ಶೋಕದಿ ನುಡಿದ | ಗಗನ ರಾಜನ ಪುತ್ರಿ | ಪದ್ಮಾವತಿಯ ಕಂಡು | ಹಗಲೂ ಇರುಳೂ | ಆಕೆ ಮುಖವ ಸ್ಮರಿಸುವೇನು ||೫||

ಅವಳಿಗೋಸ್ಕರವಾಗಿ | ಇದ್ದಲ್ಲಿಗೆ ಹೋದೆ | ಅವಳಿಂದ ಎನ್ನಶ್ವ ಹತವಾಯಿತಮ್ಮ || ಅವಳ ಹೊರೆತು | ಎನ್ನ ಪ್ರಾಣ ನಿಲ್ಲದು | ಅವಳ ಘಟನೆ ಮಾದಬೇಕಮ್ಮ ||೬||

ಅಂದ ಮಾತನು ಕೇಳಿ | ಬಕುಳಾವತಿ ಆಗ | ಆನಂದದಿ ರಾಜನ ಪುರಕೆ ತೆರೆಲಿದಳು | ಸುಂದರಿಯರ ಕಾರ್ಯ | ಸ್ಥಿರವಾಗದೆಂದು ಚೆಂದುಳ್ಳ ಸ್ತ್ರೀ ರೂಪ ಧರಿಸಿದ ಹರಿಯು || ೭ ||

ಕೊರವಂಜಿ ತಾನಾಗಿ | ನೃಪನ ಪುರಕ್ಕೋಗಿ | ಧಾರಿಣೀದೇವಿಯ ಮುಂದೆ ಶಕುನ ಹೇಳಿದನು | ತಿರುಗಿ ಬರಲು ರಾಜ | ಮಗಳ ಕೊಡುವನೆಂದು | ಹರಿಗೆ ನಿಶ್ಚಯಮಾಡಿ ಶುಕರ ಕಳುಹಿದನು ||೮||

ತಾಪಸೋತ್ತಮ ಬಂದು | ಪತ್ರವ ಕೊಡಲು | ಶ್ರೀಪತಿ ತಾನೋದಿ ಬೆನ್ನಿಂದೆ ಬರೆದಾ | ಅಪಾರವಂದ್ಯ ತಾನು | ಸುರಸ್ತೋಮವಕರೆಸಿ | ಈ ಪರಿ ವೈಭೋಗ ಮಾಡಿದ ಹರಿಯು ||೯||

ಆ ಕ್ಷಣದಲ್ಲಿ ತನ್ನ ತರುಣನ ಕರೆಸಿ | ಇಕ್ಷುಜಾಪನ ಮಾತೆ | ಬಳಿಗೆ ಪೋಗೆಂದ | ತಕ್ಷಣದಲ್ಲಿ ಸೂರ್ಯ | ಹೋಗಿ ನಿಲ್ಲಲು | ಅಕ್ಷೇಮವನೇ ಕೇಳಿ ತೆರಳಿ ಬಂದಳು || ೧೦ ||

ಬಂದ ಸತಿಯ ಕೂಡಿ | ಮoದಿರಕೆ ಪೋಗಿ | ಹಿಂದೆ ಹೇಳಿದ ವಾಕ್ಯ | ನಡೆಸೆಂದ ಹರಿಯು | ಸಂದೇಹವಿಲ್ಲದೆ ಸ್ವಾಮೀ ನಡೆಸೆಂದು | ಇಂದಿರಾದೇವಿಯು | ನುಡಿದಳು ಹರಿಗೆ || ೧೧ ||

ಸ್ವಸ್ತಿ ವಾಚನ ಮಾಡಿ | ಕುಲದೇವರನಿಟ್ಟು | ಪ್ರಸ್ಥವ ಮಾಡಿದ ದ್ವಿಜರ ಸ್ತೋಮಕ್ಕೆ | ಮರುದಿನ ಲಕ್ಷ್ಮೀಶ | ರಾಜನ ಪುರಕೆ ಸುರಸ್ತೋಮವನೇ ಕೂಡಿ ತೆರಳಿ ಬಂದನು || ೧೨ ||

ಬರುವ ಕೃಷ್ಣನ ಕಂಡು | ಶುಕಮುನಿ ಸ್ತುತಿಸಿ | ಹರಿಗೆ ಭೋಜನವನ್ನಲ್ಲಿ | ಮುದದಿ ಮಾಡಿಸಿದ | ಅಕಳಂಕ ಮಹಿಮನು | ಬಂದ ವಾರ್ತೆಯ ಕೇಳಿ | ಸಕಲ ಜನರ ಕೂಡಿ | ಕರೆ ಬಂದ ರಾಜ || ೧೩|

ಮುದದಿಂದ | ಎದುರ್ಗೊಂಡು | ಪರಿಮಳಪೂಸಿ | ಸದಮಲ ಹೃದಯನ ಕರೆತಂದರು ಮನೆಗೆ | ಪದ್ಮನಾಭನ ಪೀಠದಲ್ಲಿ ಕುಳ್ಳಿರಿಸಿ | ಮಧುರ ಮಾತಿಲಿ | ತನ್ನ ತರುಣಿ ಒಡಗೂಡಿ || ೧೪||

ಹೇಮಕುಂಭಗಳಿಂದ | ದ್ವಿಜರ ಕೈಯೊಳು | ಸ್ವಾಮಿ ಪುಷ್ಕರಣೀಯ ತೋಯವ ತರಿಸಿ | ಹೇಮ ತಟ್ಟೆಯಲ್ಲಿ | ಸ್ವಾಮಿ ಪಾದವನ್ನಿತ್ತು |ಪ್ರೆಮದಿಂದಭಿಷೇಕ ಮಾಡಿದ ರಾಜ ||೧೫ ||

ಚಿನ್ನದ ಕಿರೀಟ| ಆಭರಣವನ್ನಿಟ್ಟು | ಕನ್ಯಾದಾನವ ಮಾಡಿ | ಧನ್ಯ ತಾನಾದ | ತನ್ನ ಮಗಳ ಶ್ರೀನಿವಾಸಗೋಪ್ಪಿಸಿ | ಉನ್ನತ ಪದವಿಯ ಚೆನ್ನಾಗಿ ಪಡೆದ ||೧೬ ||

ಮಾವನಪ್ಪಣೆ ಕೊಂಡು | ವಸುಧಾನ ಗೋಸ್ತ್ರವ ಕೊಟ್ಟು | ಭಾವ ಶುದ್ದದಿ ತನ್ನ
ಮಾವಗೊಂದಿಸಿದ | ಯಾವಾಗ ಕರೆದರೂ | ಬರುವೆ ನಾನೆಂದು | ಪಾವನ ಮಾಡೆಂದು ಧರಿನಿಗೊಂದಿಸಿದ ||೧೭||

ಅಷ್ಟಗೋಪುರ ಏರಿ | ಕಣ್ಣಿಟ್ಟು ನೋಡುತಲಿ | ಎಷ್ಟು ಹೇಳಲಿ ಈಕೆ ಸುಕೃತಫಲವೆಂತು | ಅಜ ರುದ್ರ ಮೊದಲಾದ ಸುರರು ದ್ವಿಜರೆಲ್ಲ | ಸುಜನದಂದಣವೆರಿ| ಪುರಕೆ ಸಾಗಿದರು || ೧೮||

ಆರು ತಿಂಗಳು ಮೀರಿ |ಗಿರಿಗೆ ಪೊಗುವೆನೆಂದು | ಧೀರ ತಾನಿಂತನೆ |
ಕುಂಭಪುತ್ರರಾಶ್ರಮದಿ| ಧರೆಯೊಳು ಅಣಕೆರಿ ಸುರಪತಿ ಪ್ರಿಯನಾದ | ಸುಗುಣ ವೆಂಕಟನ್ನ ಪುರಂಧರ ವಿಠಲಾ ||

-- ಕೃಷ್ಣಾರ್ಪಣಮಸ್ತು --