ದೇಹ ಜೀರ್ಣವಾಯಿತು ಧನದಾಹ ಜೀರ್ಣವಾಗದು ಕೃಷ್ಣಾs Deha jeernavaayitu dhanadaha jeernavaagadu krishna

ದೇಹ ಜೀರ್ಣವಾಯಿತು ಧನದಾಹ ಜೀರ್ಣವಾಗದು ಕೃಷ್ಣಾs I

ಅಯ್ಯಾ ಕಣ್ಣು ಕಿವಿ ಮಂದವಾದವು ಹೆಣ್ಣು ಮಣ್ಣಿನಾಸೆ ಮಂದವಾಗದು ಕೃಷ್ಣಾs I

ಕಾಲು ಕೈ ಜವಗುಂದಿದವು ಭೋಗಲೋಲತೆ ಜವಗುಂದವು ಕೃಷ್ಣಾs I

ಜರೆ ರೋಗದಿಂದ ನೆರೆಹೊರೆ ಹೇಸಿತು ಈ ಶರೀರದಲ್ಲಿ ಹೇಸಿಕೆ ಇನಿತಿಲ್ಲ I

ನನ್ನ ದೇಹ ಪಾಪಕೋಟಿಗಳ ಮಾಡಿದರಿನ್ನು ತಾಪ ಮನದೊಳಗಿನಿತಿಲ್ಲ I

ಹೀಗೆ ಸಂದು ಹೋಯಿತು ಕಾಲವೆಲ್ಲವು ಮುಂದಣಗತಿ ದಾರಿ ತೋರದು ಕೃಷ್ಣಾss I

ಅನಾದಿಯಿಂದ ನಿನ್ನವನೆನಿಸಿದೆ ಎನ್ನ ಕುಂದು ನಿನ್ನದಲ್ಲವೆ ಇನ್ನಾದರು ದಯೆಯಿಂದೆನ್ನ ನೋಡಿ ಮನ್ನಿಸಬೇಕಯ್ಯ ಸಿರಿಕೃಷ್ಣಾss II

---- ಶ್ರೀ ವ್ಯಾಸರಾಜರ ರಚನೆಯ ಒಂದು ಅದ್ಭುತವಾದ ಕೃತಿ ( ಉಗಾಭೋಗ)

ಸದಾ ಎನ್ನ ಹೃದಯದಲ್ಲಿ Sadaa yenna hrudaydalli

ಸದಾ  ಎನ್ನ  ಹೃದಯದಲ್ಲಿ 
ಸದಾ  ಎನ್ನ  ಹೃದಯದಲ್ಲಿ    ವಾಸ  ಮಾಡೋ  ಶ್ರೀಹರಿ
ನಾದಮೂರ್ತಿ ನಿನ್ನ  ಪಾದ ಮೋದದಿಂದ ಭಜಿಸುವೆ  ||

ಜ್ಞಾನವೆಂಬೋ ನವರತ್ನದ ಮಂಟಪದ ಮಧ್ಯದಲ್ಲಿ  |
ವೇಣುಲೋಲನ  ಕುಳ್ಳಿರಿಸಿ  ಧ್ಯಾನದಿಂದ  ಭಜಿಸುವೆ  || 1 ||

ಭಕ್ತಿರಸವೆಂಬ  ಮುತ್ತು  ಮಾಣಿಕ್ಯದ  ಹರಿವಾಣದಿ 
ಮುಕ್ತನಾಗಬೇಕುಎಂದು  ಮುತ್ತಿನ  ಆರತಿ  ಎತ್ತುವೆ  || 2||

ನಿನ್ನ  ನಾನು  ಬಿಡುವನಲ್ಲ
ಎನ್ನ  ನೀನು  ಬಿಡಲು  ಸಲ್ಲ |

ಘನ್ನಮಹಿಮ  ವಿಜಯವಿಠಲ
ನಿನ್ನ  ಭಕ್ತರ  ಕೇಳೋ  ಸೊಲ್ಲ ||

ತುಂಗಾ ತೀರದಿ ನಿಂತ Tungaa teeradi ninta suyativaranyare

ತುಂಗಾ ತೀರದಿ ನಿಂತ ಸುಯತಿವರನ್ಯರೆ ಪೇಳಮ್ಮಯ್ಯ
ಸಂಗೀತಾಪ್ರೀಯ ಮಂಗಳ ಸುಗುಣಿತ ರಂಗ ಮುನಿಕುಲೋತ್ತುಂಗ ಪೇಳಮ್ಮ
ತುಂಗಾ ತೀರದಿ ನಿಂತ ಸುಯತಿವರನ್ಯರೆ ಪೇಳಮ್ಮಯ್ಯ

ಚಲ್ವ ಸುಮುಖ ಫಣಿಯಲ್ಲಿ ತಿಲಕ ನಾಮಗಳು ಪೇಳಮ್ಮಯ್ಯ
ಜಲಜ ಮಣಿಯು ಕೊರಳೊಲು ತುಳಸಿ ಮಾಲೆಗಳು ಪೇಳಮ್ಮಯ್ಯ
ಸುಲಲಿತ ಕಮಂಡಲ ದಂಡವನ್ನೇ ಧರಿಸಿಹನೆ ಪೇಳಮ್ಮಯ್ಯ
ಖುಲ್ಲಹಿರಣ್ಯಕನಲ್ಲಿ ಜನಿಸಿದ ಪ್ರಹ್ಲಾದನುತಾನಿಲ್ಲಿಹನಮ್ಮ

ಸುಂದರ ಚರಣರವಿಂದ ಸುಭಕುತಿಯಲಿಂದ ಪೇಳಮ್ಮಯ್ಯ
ವಂದಿಸಿ ಸ್ತುತಿಸುವ ಭೂಸುರರು ಬಲುವೃಂದ ಪೇಳಮ್ಮಯ್ಯ
ಚಂದದಲಂಕೃತಿ ಇಂದ ಶೋಭಿಸುವ ಆನಂದ ಪೇಳಮ್ಮಯ್ಯ
ಹಿಂದೆ ವ್ಯಾಸಮುನಿ ಎಂದೆನಿಸಿದ ಕರ್ಮಂದಿಗಳರಸಗ ದಿಂದ ರಹಿತನೇ

ಅಭಿನವ ಜನಾರ್ಧನ ವಿಠ್ಠಲನ ಧ್ಯಾನಿಸುವ ಪೇಳಮ್ಮಯ್ಯ
ಅಭಿವಂದಿಪರಿಗೆ ಅಖಿಲಾರ್ಥವ ಸಲ್ಲಿಸುವ ಪೇಳಮ್ಮಯ್ಯ
ನಭಮಣಿಯೆಂದದಿ ಭೂಮಿಯಲ್ಲಿ ರಾಜಿಸುವ ಪೇಳಮ್ಮಯ್ಯ
ಶುಭಗುಣ ನಿಧಿ ಶ್ರೀ ರಾಘವೇಂದ್ರ ಯತಿ
ಶುಭಗುಣ ನಿಧಿ ಶ್ರೀ ರಾಘವೇಂದ್ರ ಯತಿ ಅಭುಜ ಭಾವಾಂಡದೊಳು ಪ್ರಭಲ ಕಣಮ್ಮ

ತುಂಗಾ ತೀರದಿ ನಿಂತ ಸುಯತಿವರನ್ಯರೆ ಪೇಳಮ್ಮಯ್ಯ
ಸಂಗೀತಾಪ್ರೀಯ ಮಂಗಳ ಸುಗುಣಿತ ರಂಗ ಮುನಿಕುಲೋತ್ತುಂಗ ಪೇಳಮ್ಮ